SERRADA DE S’AUTORI
Su prus de sa cosa chi eis lìgiu innoi dd’apu scrita unus cuìndixi annus a oi. Deu femu diversu e su mundu fiat diversu. Su mundu càmbiat dònnia segundu figureussì chi no at cambiau in totu custus annus. E duncas sa manera mia de scriri puru at cambiau, ca sa lìngua no est firma, càmbiat cun su tempus cumenti càmbiat s’òmini etotu. Cosa meda de custu libureddu oi dd’emu a essi scrita de atra manera, ma est giustu puru a lassai testimonia de cussu tempus, de cussus passàgius, ca de unu logu tocat a cumentzai.
Sa primu parti est po is Micro-contus. Unu sperimenteddu chi emu fatu in su blog cosa mia, candu ddu tenemu, po scriri contus surrealis e de atra genia impari a atrus autoris chi iant fatu parti a sa faina. Innoi nd’apu pinnigau is mius sceti ca mi parit cosa chi potzat interessai. Siat po sa sperimentatzioni cun su sardu e siat ca impari a gopai Arrogalla nd’emus fatu unu reading puru e emus girau unu paghiteddu in is palcus de s’ìsula nosta, spassiendisì ma fintzas faendi un’operatzioni curturali bellixedda, mi parit. No pentzu de esagerai narendi ca Micro-contus est stètiu unu momentu de importu po sa fueddada nosta. Funt abarraus on line unus cant’annus ma imoi est sparèssiu totu e duncas m’est partu giustu a ddus torrai a pubricai in paperi, po totu is arrexonis chi eus nau. Speru de essi fatu cosa agradèssia, po is chi si ddus arregordant ancoras e po is chi ddus ant a connosci imoi sa primu borta.
Infatu nc’apu postu atrus contus longhitus, sèmpiri de cussu tempus etotu. Ddus apu mesu arrangiaus ma no meda meda, po no ddus sbisuriai e po lassai cuddu gustu de cuìndixi annus fait, ca is argumentus puru funt de intzandus e no bollu a mi ddus tocai, finas ca calincunu est premiau puru. E cumenti si siat, po scriri cosa noa gei nc’at a essi tempus.
Unu contu sceti est nou, su de s’arregiola alliscinosa, ca dd’apu scritu ocannu po unu podcast in sardu, e m’est pràxiu a nci ddu ponni innoi po no ddu lassai a solu a solu in su cadàsciu, in su computer antzis. M’eis a perdonai. Calincun’atru chi apu agatau deu est abarrau a foras. No mi praxiat prus, no mi cumbinciat e at tocau a ddu sacrificai, nareus aici. Ma ndi capitat aici puru e no fait a ddi fai nudda. Atrus contus chi funt bessius in atras arregortas, cumenti a Gaici in su lìburu Campo delle storie de Robertu Mura e Cinemà Dessè in Prolagus de Andria Andrillo, funt aturaus a foras aici etotu ca ddus agatais innias e no nci fiat su tanti de nci ddus torrai a ponni innoi. Su contu de Sant’Efis fiat bessiu in d-unu nùmeru de s’arrevista Làcanas e su de su fogu s’agatat ancoras on line, ma custus apu detzìdiu de nci ddus ponni.
Eis a agatai fintzas S’annu chi no apu fatu nudda, chi no funt contus ma unas cantu pentzadas chi apu tentu in is annus e chi emu pinnigau apari po una pubricatzioni chi fiat bessia in su pròpiu tempus de is contus, in forma de ebook. Sparèssia cussu puru. E duncas allodda innoi.
E serraus cun d-unas cantu cantzoneddas, bècias e noas, chi nc’apu bòfiu aciungi. Calincuna dd’at cantada s’amigu miu Andria Serpi in su discu de issu Apu intèndiu su bentu. A ùrtimu totu, una lìtera chi apu scritu una pariga de annus fait.
Sa prefatzioni mi dd’at fata Franciscu Medda Arrogalla, cumenti est giustu, giai ca issu puru fiat parti de su progetu Micro-contus, cun su traballu suu de sonadori, e ddi torru gràtzias.
De totu s’atru, sa curpa est sa mia.
Spassiaisì!
Ivo Murgia
Biografia
Ivo Murgia (Casteddu, 1974) operaju curturali, presentat programas in sardu e scrit lìburus de viàgiu in italianu ma a bortas is cosas s'amisturant apari.
Micro-contus e atrus contus longhitus
Gli indipendenti
Anno di publicazione 2026
Titolo: Micro-contus e atrus contus longhitus
Autore: Ivo Murgia
Copertina Morbida - 138 pagine b/n
Prezzo: Euro 15
ISBN 9791281025103
DISPONIBILE
Titolo: Micro-contus e atrus contus longhitus
Autore: Ivo Murgia
Copertina Morbida - 138 pagine b/n
Prezzo: Euro 15
ISBN 9791281025103
DISPONIBILE
15.00 €
Aggiungi